മുപ്പത്തി മൂന്ന്‌

തല കൈമോശം വരുമ്പോള്‍
ചെടികള്‍ക്കും
എന്തൊരു അച്ചടക്കമാണ്..

മുപ്പത്തി രണ്ട്‌

'മുമ്പിയാള്‍ രത്‌നാകരനെന്ന
പെരും കള്ളനായിരുന്നു യുവറോണര്‍..'

ഭൂതകാലം ചികഞ്ഞും തെളിവുണ്ടാക്കുന്ന
പോലീസ് വിദ്യ മാനിഷാദ പറയുന്നേരം
വാല്‍മീകി ഓര്‍ത്തു കാണില്ല...

മുപ്പത്തൊന്ന്‌

കുളത്തിന് വെളിയില്‍ കരയെന്ന
വലിയൊരു ലോകമുണ്ടത്രെ....

കരയില്‍ പക്ഷെ, മീനിനെന്ത്..?

മുപ്പത്‌

പത്രത്തില്‍ മരിച്ചവര്‍ക്കായി
ഒരു പേജുണ്ട്...
ബാക്കിയെല്ലാം ജീവിച്ചിരിക്കുന്നവരുടെ
തോന്നിവാസങ്ങള്‍ക്കാണത്രെ....

ഇരുപത്തി ഒമ്പത്‌

'പെട്ടന്നൊരു സ്‌ഫോടനം..
പിന്നെയാണീ പ്രപഞ്ചം
ഇക്കാണും രൂപത്തിലായത്..'

അധ്യാപകന്റെ വാക്കുകളില്‍ നിന്ന്
കുട്ടികള്‍ ഇങ്ങനെ തെളിവെടുത്തു:
-അന്നും അല്‍ഖാഇദ ഉണ്ടായിരുന്നു-

ഇരുപത്തി എട്ട്‌

കല്ലെറിഞ്ഞ് മാങ്ങയറുക്കാമെന്നോ..
ഞാനില്ല...
മാങ്ങയൊക്കെ അഛന്‍
ഫ്രൂട്ട്ബസാറില്‍ നിന്ന് വാങ്ങിവരും..

ഇരുപത്തിയേഴ്‌

പ്രതിമകളാകാനായിരുന്നോ
കഴിഞ്ഞകാലങ്ങളില്‍ ഇവരിത്രയും
പണിപ്പെട്ടത്..?